Take a fresh look at your lifestyle.

ደርባ ሲሚንቶ በአካባቢው ወጣቶች በተፈጠረበት ችግር ሥራ ማቆሙ አስታወቀ

በሰሜን ምዕራብ ኦሮሚያ ሙገር ሸለቆ ከአዲስ አበባ ከተማ በ70 ኪሎ ሜትር ርቀት ላይ የሚገኘው ደርባ ሲሚንቶ ፋብሪካ፣ በአካባቢው ወጣቶች በተፈጠረበት ችግር ምክንያት ማምረት ማቆሙ ተጠቆመ፡፡

ለፋብሪካው ሥራ ማቆም ምክንያቱ ምን እንደሆነ የሪፖርተር ታማኝ ምንጮች እንዳረጋገጡት፣ የአካባቢው ወጣቶች በመደራጀት ወደ ፋብሪካው በመሄድ ‹‹ሥራ ቅጠሩን›› በማለት ችግር በመፍጠራቸው ነው፡፡ ፋብሪካው አሁን እየሠሩ ካሉ ሠራተኞች በተጨማሪ ሌላ የሰው ኃይል እንደማያስፈልገው ለወጣቶቹ የገለጸላቸው ቢሆንም፣ ወጣቶቹ ሊረዱ ባለመቻላቸው ፋብሪካውን ሥራ በማስቆም ከአካባቢው የወረዳ ኃላፊዎች ጋር እየተወያየ መሆኑን ምንጮች ተናግረዋል፡፡

ባለፈው ሳምንት መጀመርያ አካባቢ የተፈጠረው ችግር እየጠነከረ መጥቶ፣ ሥራ ከቆመ አንድ ሳምንት እንደሞላው አክለዋል፡፡ ወጣቶቹ ቀደም ሲል ከአንድ ተሽከርካሪ ላይ ለሚያወርዱት ጥሬ ዕቃ 200 ብር ያስከፍሉ የነበረ ቢሆንም፣ አሁን ግን ‹‹700 ብር ሊከፈለን ይገባል›› በማለት ችግሩን ከፍ እያደረጉት መምጣታቸውንም ምንጮች አረጋግጠዋል፡፡

ፋብሪካው በተገነባበት አካባቢ ይኖሩ የነበሩ ሰዎች ቀድሞ የተከፈላቸው ካሳ በቂ እንዳልሆነ በመግለጽ፣ በድጋሚ እንዲከፈላቸው መጠየቃቸውም ተጠቁሟል፡፡ በአካባቢው ያለው ግርግር ያስፈራቸው የፋብሪካው የተወሰኑ ሠራተኞች ከሐምሌ 19 ቀን 2010 ዓ.ም. ጀምሮ ወደ አዲስ አበባ መምጣታቸውንና እስከ ሐምሌ 27 ቀን 2010 ዓ.ም. ድረስ ሥራ ባለመጀመሩ እንዳልተመለሱ ገልጸዋል፡፡

ሪፖርተር በስልክ ያነጋገራቸው የደርባ ሚድሮክ ግሩፕ ዋና ሥራ አስፈጻሚ አቶ ኃይሌ አሰግዴ በሰጡት ምላሽ፣ ‹‹ችግሩ የወረዳው አስተዳደርና የነዋሪዎች እንጂ ከፋብሪካው ጋር የሚያገናኝ ነገር የለም፤›› ብለዋል፡፡ ፋብሪካውም ሥራ መጀመሩን ተናግረዋል፡፡ ነገር ግን ሪፖርተር ማተሚያ ቤት እስከገባበት ዓርብ ምሽት ሐምሌ 27 ቀን 2010 ዓ.ም. ድረስ ፋብሪካው ሥራ አለመጀመሩን፣ ስማቸው እንዲገለጽ ያልፈለጉ ሠራተኞች አረጋግጠዋል፡፡

(ምንጭ፦ሪፖርተር)

Leave A Reply

Your email address will not be published.