Take a fresh look at your lifestyle.

ከተመረቀ ወር ያልሞላው ረጲ ኃይል ማመንጫ ጣቢያ ሥራ አቆመ

በቅርቡ ሥራ የጀመረው የረጲ ደረቅ ቆሻሻ ኤሌክትሪክ ኃይል ማመንጫ፣ በተመረቀ በሁለት ሳምንቱ ሥራ አቆመ፡፡

የረጲ ደረቅ ቆሻሻ ኃይል ማመንጫ 2.6 ቢሊዮን ብር ወጪ ወጥቶበት፣ ሥራ መጀመር ከነበረበት ጊዜ በሁለት ዓመት ዘግይቶ ነበር የተጠናቀቀው፡፡

ነገር ግን ነሐሴ 13 ቀን 2010 ዓ.ም. የፌዴራል መንግሥትና የአዲስ አበባ ከተማ አስተዳደር ባለሥልጣናት በተገኙበት ቢመረቅም፣ ብዙ ርቀት መጓዝ ሳይችል በሁለት ሳምንቱ ከአገልግሎት ውጪ ሆኗል፡፡

መረጃዎች እንደሚጠቁሙት ፕሮጀክቱ ያልተጠናቀቁ ሥራዎች ያሉበት ቢሆንም፣ ሙሉ በሙሉ ሳይጠናቀቅ ፕሬዚዳንት ሙላቱ ተሾመ (ዶ/ር) እና የአዲስ አበባ ከተማ ምክትል ከንቲባ ታከለ ኡማ (ኢንጂነር) በተገኙበት መመረቁ ተመልክቷል፡፡

በቅርቡ የኢትዮጵያ ኤሌክትሪክ ኃይል ዋና ሥራ አስፈጻሚ ሆነው የተሾሙት አብርሃም በላይ (ዶ/ር) ለሪፖርተር እንደገለጹት፣ የረጲ ደረቅ ቆሻሻ ኤሌክትሪክ ኃይል ማመንጫ ሥራውን ያቆመው ባልተጠናቀቁ ሥራዎች ምክንያት ነው፡፡

‹‹ያላለቁ ሥራዎችን ለመጨረስ የኤሌክትሪክ ኃይል ማመንጫ ጣቢያው ሥራውን አቁሟል፤›› ሲሉ ገልጸዋል፡፡

በሌላ በኩል የኃይል ማመንጫውን የገነባው የካምብሪጅ ኢንዱስትሪስ ማኔጂንግ ዳይሬክተር አቶ ሳሙኤል ዓለማየሁ ለሪፖርተር እንደገለጹት፣ ፕሮጀክቱን የተረከቡት ከጥናቱ ግንባታውን አጠናቆ እስከ ማስረከብ (የፕሮጀክቱን ኢንጂነሪንግ፣ ግዥና ግንባታ አጠናቆ ማስከረብ) ነው፡፡ ‹‹ሆኖም ፕሮጀክቱን ገንብተን ካጠናቀቅን በኋላ ሥራውን የሚረከበን አካል መኖር አለበት፤›› ብለዋል፡፡ ‹‹የእኛ ኃላፊነት ፕሮጀክቱን አጠናቆ የአራት ቀናት ሙከራ ማድረግ እንጂ፣ ሥራውን ማስቀጠል ኃላፊነታችን አይደለም፤›› ብለዋል፡፡ በኃይል ማመንጫው ያደረጉትን የመጀመርያ ሙከራ በመንግሥት እንዲደገም መጠየቁን የተናገሩት ማኔጂንግ ዳይሬክተሩ፣ በውላቸው መሠረት ሙከራውን ሊደግሙትም ላይደግሙትም እንደሚችሉ አስታውቀዋል፡፡

የረጲ ደረቅ ቆሻሻ ኤሌክትሪክ ኃይል ማመንጫ የኮንትራት ውሉ በተፈረመበት ወቅት ያመነጫል የተባለው 50 ሜጋ ዋት የኤሌክትሪክ ኃይል ቢሆንም፣ ፕሮጀክቱ ተጠናቀቀ በተባለበት ነሐሴ 13 ቀን 2010 ዓ.ም. እንደተገለጸው የማምረት አቅሙ በግማሽ ቀንሶ 25 ሜጋ ዋት ብቻ ነው፡፡ ይህንንም አስመልክቶ አቶ ሳሙኤል፣ ‹‹እኛ ውላችን ላይ የተስማማነው 25 ሜጋ ዋጋት ለማመንጨት ብቻ ነው፤›› ብለዋል፡፡

ግንባታውን ያካሄደው ካምብሪጅ ኢንዱስትሪስ ኩባንያ፣ በዚህ ምክንያት ከኢትዮጵያ ኤሌክትሪክ ኃይል ጋር ውዝግብ ውስጥ መግባቱ ታውቋል፡፡

ይህ ፕሮጀክት ሥራውን ለማከናወን የተገነባው ከአዲስ አበባ ከተማ በየቀኑ በሚመነጩት ደረቅ ቆሻሻ ነው፡፡ በአዲስ አበባ በቀን ሦስት ሺሕ ሜትሪክ ቶን ደረቅ ቆሻሻ የሚመነጭ ሲሆን፣ ፕሮጀክቱ በቀን 1,400 ሜትሪክ ቶን ደረቅ ቆሻሻ ይጠቀማል ተብሎ ነበር፡፡

Leave A Reply

Your email address will not be published.