Take a fresh look at your lifestyle.

የኢትዮጵያ አየር መንገድ የአየር ትራፊክ ቁጥጥር ባለሙያዎች ፍርድ ቤት ቀረቡ

በፌዴራል ፖሊስ ትናንት በቁጥጥር ስር የዋሉት  የኢትዮጵያ አየር መንገድ የአየር ትራፊክ ቁጥጥር ባለሙያዎች ፍ/ቤት ቀረቡ።

“በሀገር ኢኮኖሚ ላይ አሻጥር በመስራትና  ጫና ማሳደር በሚል ወንጀል ተሳትፈዋል” በሚል ተጠርጥረው ትናንት በቁጥጥር ስር የዋሉት 9ኙ የሲቪል አቪዬሽን  የአየር ትራፊክ ቁጥጥር  ሰራተኞች ዛሬ ፍርድ ቤት መቅረባቸውን ኢቲቪ ዘግቧል።

የፌዴራል ፖሊስ ኮሚሽን የምርመራ ቡድን በፌደራል የመጀመሪያ ደረጃ ፍርድ ቤት አራዳ ምድብ 1ኛ ወንጀል ችሎት በአቀረበው የምርመራ መዝገብ ተጠርጣሪዎች በቡድን በመደራጀት መንግስትና ህዝብን ለማለያየት ተንቀሳቅሰዋል በማለት ለፍ/ቤቱ ማስረዳቱ ተጠቁሟል።

ወርሃዊ ደሞዛቸው በአስር እጥፍ እንዲያድግና ሌሎች ጥቅማጥቅሞች አልተከበሩልንም በማለት ከነሐሴ 21 ጀምሮ የስራ ማቆም አድማ ማድረጋቸውንም ፖሊስ ጠቅሷል፡፡

ለዚህም እንዲረዳቸው የሌሎች ሰራተኞችን ፊርማ በማስመሰል መፈረምና ስራ እንዲያቆሙ አነሳስተዋል በሚል ወንጀል ተጠርጥረው በቁጥጥር ስር እንዲውሉ ካደረጓቸው ምክንያቶች መካከል እንደሚገኝበትም የምርመራ ቡድኑ በመዝገቡ አካቷል፡፡

የምርመራ ቡድኑ ሌሎች የምርመራ ስራዎችን ለማከናወን 14 ቀናትን የጠየቀ ቢሆንም ፍርድ ቤቱ  ለመስከረም 2 /2ዐ11ዓ.ም ተለዋጭ ቀጠሮ ሰጥቷል።

ተጠርጣሪዎች በበኩላቸው የመብት ጥያቄዎችን ማንሳታቸውን በመጥቀስ ፍርድ ቤቱ የዋስትና መብታቸው እንዲያከብርላቸው ማመልከታቸውም ተመልክቷል።

Leave A Reply

Your email address will not be published.