Take a fresh look at your lifestyle.

“ኦሮሞ ሀገር ሊገነጥል ነዉ” የሚለዉ ማስፈራሪያ ህዝቦች እንዳይተማመኑ ለማድረግ የተሸረበ ሴራ ነዉ

በእርግጥ በአማራ እና በኦሮሞ ህዝቦች መሃከል ከፍተኛ ሴራ ተሸርቧል። የሁለቱ ህዝቦች ጠላት አማራ እና ኦሮሞ መቼም ሊታረቅ የማይችል ቅራኔ እንደላቸዉ አድርጎ በመሳል በሁለቱ መሀከል መፈራራት እንድነግስ አድርጓል። ኦሮሞ ጠባብ ሲባል አማራ ደግሞ ትምክህተኛ ተብሎ ተፈርጇል። የሁለቱ ህዝቦች የጋራ ባላንጣ ሁለቱን በማጋጨት ቁማር ሲጫወት ኖሯል። “እኛ ባንኖር አማራ ከምድረ-ገፅ ያጠፋችሁ ነበር” ያሉኝ ወገኖች አሉ። እነዚሁ ወገኖች “ኦሮሞ እንዳይፈጃችሁ ያደረግነዉ እኛ ነን” ብለዉ እንደነገሩት አንድ አማራ ጓደኛዬ ነግሮኛል።

አማራ ያለፈዉን ሥርዓት ይፈልጋል ተብሎ ለኦሮሞ ይነገራል። ነገር ግን ይህ ፈፅሞ ሊታሰብ የማይችል ሃሰት ነዉ። የፊዉደል ሥርዓት ዳግም ላይመለስ ሞቶ ተቀብሯል። ስለዚህ የአማራ ልሂቃን በ21ኛ ክፍለ ዘመን በራሱ ጊዜ አርጅቶ የሞተዉን የፊዉዳል ሥርአት የመመለስ ህልም አላቸው ማለት በራሱ ከባድ ስድብ ነዉ። ጤነኛ አዕምሮ ያለዉ አማራ ይህን ሊያስብ አይችልም። ያንን የሚፈልግ ሞኝ እንኳን ቢኖር አሁን ባለንበት ሁኔታ ፍላጎቱ የቀን ቅዠት ነዉ።

በሌላ በኩል ደግሞ ኦሮሞ ሀገር ለመገንጠል እና አማራን ሊበቀል ይፈልጋል በማለት ለአማራ ይተረካል። ይህም እዉነት አይደለም። ከግፍ ብዛት መገንጠልን እንደ አማራጭ የሚያስቡ ወገኖች ቢኖሩም መብቱ እና ጥቅሙ በአግባቡ የተከበረለት ኦሮሞ መገንጠል አይፈልግም። እንኳን ኢትዮጵያ አፍሪካ በሙሉ አንድ ሀገር ቢሆን ኦሮሞ ይፈልጋል። ዓለም አንድ መንደር በሆነችበት ወቅት መለያየት ለማንም አይበጅም። ስለዚህ “ኦሮሞ ሀገር ሊገነጥል ነዉ” የሚለዉ ማስፈራሪያ ህዝቦች እንዳይተማመኑ ለማድረግ የተሸረቤ ሴራ ነዉ። ከስንት ዘመን በፊት ለተከሰተ በደልም ዛሬ ላይ ስለበቀል ማሰብም ኋላቀርነት ነዉ። አማራም ሆነ ሌላ ብሔር በዚህ የሀሰት ፕሮፓጋንዳ ሊሰጋ አይገባም። በሆነ ተዓምር ኦሮሚያ ብትገነጠል እንኳን የሚፈጠር ችግር የለም። መገንጠል ማለት የአስተዳደር ድንበር መለየት እንጂ መሬቱን ነቅሎ ወደ ኤሲያ ወይም አዉሮፓ መዉሰድ አይደለም። ጀርመን እና ፈረንሳይ የተለያዪ ሀገሮች ቢሆኑም በአንድነት መኖር አላቃታቸዉም። ዋናዉ ጉዳይ ከተንኮል እና ከሸፍጥ በፀዳ መልኩ ለጋራ ጥቅም በቅንነት መሥራት ነዉ። By Taye Dendea

Leave A Reply

Your email address will not be published.