Take a fresh look at your lifestyle.

ኢትዮጵያ ያስቀመጠችው የመጠባበቂያ እህል ክምችት ተመናምኗል ተባለ

በኢትዮጵያ የተፈናቃዮች ቁጥር 3.19 ሚሊዮን መድረሱን የተባበሩት መንግስታት ባለፈው ሳምንት ባወጣው መግለጫ አስታውቋል፡፡ከነዚህም መካከል 30 ፐርሰንቱ የእለት ጉርስ የሚሹ ናቸው ብሏል፡፡

የኢዜአ ደግሞ የሚከተለውን ዜና ዛሬ ዘግቧል፡፡

በኢትዮጵያ በተለያዩ አካባቢዎች በሚከሰቱ ግጭቶች ምክንያት የእለት ደራሽ ድጋፍ ፈላጊዎች በመበራከታቸው የመጠባበቂያ እህል ክምችቱ ተመናምኗል ተባለ።

ይህንንም ተከትሎ 6 ሚሊዮን ኩንታል እህል ከውጭ ለመግዛት ጨረታ ወጥቶ በሂደት ላይ ይገኛል።

በአገሪቷ ሰው ሰራሽና የተፈጥሮ አደጋዎች ሲያጋጥሙ ከመጠባበቂያ እህል ክምችት በማውጣት ጉዳት ለደረሰባቸው ዜጎች እርዳታና ድጋፍ ማድረግ የተለመደ ነው።

ከጥቂት ዓመታት ወዲህ በኢትዮጵያ የተለያዩ አካባቢዎች በሚከሰቱ ግጭቶች በርካታ ዜጎች ከቤት ንብረታቸው ተፈናቅለው የእለት ደራሽ ድጋፍ እየተደረገላቸው ይገኛል።

ይህም በመሆኑ መንግስት አከማችቶት የነበረው የመጠባበቂያ እህል እየተመናመነ መምጣቱን የብሄራዊ አደጋ ስጋት ስራ አመራር ኮሚሽን ገልጿል።

በኮሚሽኑ የአቅርቦትና ሎጂስቲክ ዳይሬክተሩ አቶ አይደሩስ ሀሰን ለኢዜአ እንደገለጹት በእለት ደራሽ እርዳታ ፈላጊዎች መበራከት የመጠባበቂያ ክምችቱ ተመናምኗል።

መንግስት ለመጠባበቂያ እህል ክምችቱና ለአስቸኳይ ጊዜ ድጋፍ ስድስት ሚሊዮን ኩንታል እህል ለመግዛት ጨረታ አውጥቷል።

ግዥው እስኪፈጸም ድረስም ለሰብዓዊ ምላሹ የሚሆን እህል ከአገር ውስጥ  ዩኒየኖች ፌዴሬሽኖችና የህብረት ስራ ማህበራት፣አምራቾችና ግለሰቦች እየተገዛ መሆኑን ዳይሬክተሩ ተናግረዋል።

ቀደም ሲል ከክምችቱ ለተለያዩ ምክንያቶች በብድር ወጥቶ የነበረውም እህል እየተመለሰ መሆኑን ገልጸዋል።

የመጠባበቂያ እህል ክምችቱ  በተፈጥሮና ሰው ሠራሽ አደጋዎች እንዲሁም በሌሎች ክስተቶች ምክንያት የምግብ አቅርቦት እጥረት ሲያጋጥም ወቅታዊ ምላሽ ይሰጣል።

በአቅርቦትና ፍላጎት አለመጣጣም የእህል ገበያ ዋጋ ንረት ሲፈጠርም  ገበያውን እንዲያረጋጋ የሚያግዝ ነው።

ከሰላም ሚኒስቴር በቅርቡ የተገኘ መረጃ እንደሚያመለክተው በተለያዩ የአገሪቱ ክፍሎች በተከሰቱ ግጭቶች ምክንያት 2 ነጥብ 7  ሚሊዮን ዜጎች ከኑሯቸው ተፈናቅለዋል።

Leave A Reply

Your email address will not be published.