Take a fresh look at your lifestyle.

በአዲስ አበባ ዛሬ በተካሄደው የተቃውሞ ሰልፍ ላይ ከ12 ሰዎች በላይ መሞታቸው ታወቀ

በአዲስ አበባ  ዙሪያ ጎሳ ተኮር ጥቃቶችን በመቃወም ሰልፍ ከወጡ ሰዎች መካከል ከ12 በላይ የሚሆኑት መሞታቸው የሚወጡ መረጃዎች ጠቁመዋል።የፌዴራል ፖሊስ ኮሚሽን ኮሚሽነር ዘይኑ ጀማል በበኩላቸው የሞቱት ሰዎች አምስት ናቸው ብለዋል።

የፌዴራል ፖሊስ ኮሚሽነር ጄኔራል ዘይኑ ጀማል ለመንግስት ሚዲያዎች በሰጡት መግለጫ “የተወሰኑ  ሰዎች በቡድን ተደራጅተው የፀጥታ ኃይሎችን መሣሪያ ለመቀማት ሞክረዋል፡፡ አከፖሊስ ጋር ግብግብ የገጠሙትን በአካባቢው የነበሩ የፀጥታ ኃይሎች የማያዳግም ዕርምጃ ወስደው የተወሰኑ ሰዎች መሞታቸውና መቁሰላቸው ታውቋል።” ሲሉ ገልጸዋል።ከዚህ በተጨማሪም በሰልፉ ውስጥ ቦምብ ይዘው የወጡ ግለሰቦች መገኘታቸውንና በሰላማዊ ሰልፉ ተሳታፊዎች ጥቆማ መያዛቸውን ኮሚሽነሩ አስታውቀዋል፡፡

በቡራዩና አካባቢውም ሆነ በአዲስ አበባ የተከሰቱትን ግጭቶች አስመልክተው የተናገሩት ኮሚሽነሩ፣ ግርግሩ ሆን ተብሎ የተጀመረውን ለውጥ እንዳይሳካ ለማድረግ ሰፊ የሆነ ዕቅድ ተዘጋጅቶ የተካሄደ ነበር ብለዋል፡፡

በአዲስ አበባ ገንዘብ ተሰጥቷቸው የተሰማሩ ግለሰቦች ብሔር ተኮር ስድብ የታከለበት እንቅስቃሴ ሲያደርጉ ነበር ሲሉም ኮሚሽነሩ ተናግረዋል፡፡ኮሚሽነሩ አክለውም ተዘርፈው የተቀመጡ ንብረቶችን ፖሊስ ከጫካ እየሰበሰበ መሆኑንም ገልጸዋል፡፡በቡራዩና በአካባቢው በተፈጸመ ጥቃት የተጠረጠሩ ከ300 በላይ ግለሰቦች ተይዘዋል ብለዋል፡፡

ሰሞኑን በቡራዩና አካባቢው ዘርን መሰረት ያደረገ ጥቃት የተፈፀመ ሲሆን ከ50 በላይ ሰዎች መሞታቸውን እንዲሁም በርካታ ንጹሃን ዜጎች ላይ ከፍተኛ የአካልና የሞራል ጉዳት መድረሱ ይታወቃል።

Leave A Reply

Your email address will not be published.